ၸိုဝ်ႈ - ၸၢႆးၸွမ်မိူင်း
တီႈယူႇ - ၸေႊဝဵင်းၵျွၵ်ႉမႄး
ၸၼ်ႉႁဵၼ်း - B.A(Geog:)
ပိုၼ်းၵႅပ်ႈသူၼ်ႇတူဝ် - ၸႃႇတီႉတီႈၵိူတ်ႇပဵၼ် မၢၼ်ႈၸေႃးတီႉၵုင်း၊ ဢိူင်ႇၼမ်ႉႁူးတွင်း၊ ၸေႊဝဵင်းၵျွၵ်ႉမႄး။ မိူဝ်ႈလဵၵ်ႉ ၶိုၼ်ႈႁဵၼ်းတီႈႁူင်းႁဵၼ်းၸၼ်ႉငဝ်ႈၼမ်ႉမေႃႇၽိူၵ်ႇ(ၼမ်ႉႁူးတွင်း)၊ ၸေႊဝဵင်းၵျွၵ်ႉမႄး။ ယဝ်ႉၸၼ်ႉငဝ်ႈတီႈႁူင်းႁဵၼ်းၼမ်ႉမေႃႇၽိူၵ်ႇယဝ်ႉယဝ်ႉ သိုပ်ႇၶိုၼ်ႈႁဵၼ်း ၸၼ်ႉႁႃႈ တေႃႇ ၸၼ်ႉသိပ်း တီႈႁူင်းႁဵၼ်းၸၼ်ႉသုင် - မၢႆၼိူင်ႈ၊ ၸေႊဝဵင်းၵျွၵ်ႉမႄး မိူဝ်ႈပီႊၶရိတ်ႉ 2006 - 2007။ ပီႊ 2009 - 2011 ၶိုၼ်ႈႁဵၼ်းၸၼ်ႉၸွမ်လႃႈသဵဝ်ႈ၊ ၸေႊဝဵင်းလႃႈသဵဝ်ႈ။ ပီႊ 2012 ႁပ်ႉၸုမ်ႈၶူး ပၢႆးလႅင်ႊမိူင်း(Geog:) တီႈဝဵင်းတႃႈလိူဝ်ႇ(မၢၼ်းတလေး)။
မိူဝ်ႈပီႊၶရိတ်ႉ 2003 - 2004 လႆႈတႄႇလဵပ်ႈႁဵၼ်းဢဝ် ပၢႆးလိၵ်ႈလၢႆးတႆး တီႈမေႃသွၼ် ယိင်းလၢဝ်ၾႃႉသႂ် တီႈမၢၼ်ႈၸေႃးတီႉၵုင်း၊ ၸေႊဝဵင်းၵျွၵ်ႉမႄး ပီႊသိုပ်ႇပီႊ ၵူႊၶၢဝ်းမႆႈယဝ်ႉ။ ထိုင်မႃးမိူဝ်ႈပီႊ 2007 ၶၢဝ်းမႆႈ သိုပ်ႇၶိုၼ်ႈႁဵၼ်းဢဝ် ပၢႆးလိၵ်ႈလၢႆးတႆး တီႈႁူင်းႁဵၼ်း ၼမ်ႉမေႃႇၽိူၵ်ႇ(မိူဝ်ႈၶၢဝ်းမႆႈ) ဢၼ်ၸၼ်ႉထၢၼ်ႈဢိူင်ႇ ၸတ်းႁဵတ်းပၼ် ပၢင်သွၼ်လိၵ်ႈတႆးၶၢဝ်းမႆႈၼၼ်ႉမႃး။
မိူဝ်ႈပီႊ 2008 ၶၢဝ်းမႆႈၼၼ်ႉ လႆႈၶဝ်ႈၶႄႉပၢင်တႅမ်ႈလိၵ်ႈပိုတ်ႇ ၸၼ်ႉၸေႊဝဵင်းသေ လႆႈႁပ်ႉဢဝ်သူးထီႉသွင်၊ ၶႄႉတီႈပၢင်ၶႄႉသဵင်ႇ တႅမ်ႈလိၵ်ႈပွင်သမ်ႉ လႆႈထီႉၼိူင်ႈ။ ပီႊ 2008 ၼၼ်ႉၼင်ႇၵဝ်ႇ လႆႈၶဝ်ႈၵႅမ်ထႅမ်ၸွၺ်ႈ မေႃသွၼ်လိၵ်ႈတႆး တီႈပၢင်သွၼ်လိၵ်ႈတႆးၶၢဝ်းမႆႈ ဢၼ်ၸတ်းႁဵတ်း တီႈႁူင်းႁဵၼ်းၸၼ်ႉငဝ်ႈၼမ်ႉမေႃႇၽိူၵ်ႇ ဢိူင်ႇၼမ်ႉႁူးတွင်းၼၼ်ႉယူႇ။
ထိုင်မႃး ပီႊ 2009 လႆႈၶဝ်ႈလဵပ်ႈႁဵၼ်းဢဝ်ထႅင်ႈ ပၢႆးလိၵ်ႈလၢႆးတႆး သဵင်တႅတ်ႈ(လိၵ်ႈတႆး ႁူမ်ႈတူဝ်) တင်းလၢႆးပိူင်တႅမ်ႈလူ တႅတ်ႈၼႅတ်ႈလီ ဢၼ်မေႃသွၼ်လူင်လုင်းၸၢႆးသုၼ်ႇၾႃႈ(ၸၢႆးၾႃႈၼမ်ႉတူႈ) ဢွၼ်ႁူဝ်တင်းႁဵတ်း ပၢင်ၽိုၵ်းၽွၼ်ႉ လၢႆးပူင်သွၼ် လိၵ်ႈလၢႆးတႆး တီႈဝတ်ႉၸေႃးတီႉၵႃႇရူင်ႇ၊ မၢၼ်ႈၵွင်းမူး၊ ၸေႊဝဵင်းၵျွၵ်ႉမႄးၼၼ်ႉယဝ်ႉ။
မိူဝ်ႈၼၼ်ႉ လႆႈႁဵၼ်းႁူႉပႃး လွင်ႈလၢႆး လၢႆးတႅမ်ႈဢွၵ်ႇသဵင်ၶေႃႈလိၵ်ႈၵႂၢမ်းတႆး ဢၼ်ဢဝ် တူဝ်မႄႈလိၵ်ႈ ဢိင်းၵလဵတ်ႈ တႅမ်ႈႁူမ်ႈဢွၵ်ႇသဵင်တႆးၼၼ်ႉမႃးယူႇယဝ်ႉ။ [ မေႃသွၼ်သမ်ႉပဵၼ် ၽူႈတႅမ်ႈလိၵ်ႈ ၶုၼ်ယုင်းၶဵဝ်(မေႃသွၼ်ၸၢႆးၸိုၼ်ႈတီႇတီႇသူင်ႇ) ၵေႃႉဢၼ်ၶူင်ႊသၢင်ႈပၼ် ၾွၼ်ႉ လိၵ်ႈတႆး ယူႇၼီႇၶူတ်ႉ(Unicode) ဢၼ်တၢင်ႇၶိုၼ်ႈပၢႆးၼႄပၼ် ၼိူဝ်ၼႅင်ႈၾႃႉ ႁႂ်ႈၵူၼ်းတင်းလုမ်ႈၾႃႉ ပေႃးလႆႈႁူႉၸၵ်းဝႃႈ လိၵ်ႈလၢႆးတႆးႁဝ်းၵေႃႈ ဢဝ်တႅမ်ႈလူၸႂ်ႉတိုဝ်းလႆႈ ၼိူဝ်ၼႅင်ႈၾႃႉ မိူၼ်ပိူၼ်ႈယူႇ ၼႆၼၼ်ႉယဝ်ႉ။ ပီႊ 2009 လိူၼ်ထူၼ်ႈသွင် ဝၼ်းထီႈ 7 (ဝၼ်းၶိူဝ်းတႆး) ၼႆႉ ပဵၼ်ပီႊဢၼ်လီမၢႆတွင်း လွင်ႈလိၵ်ႈလၢႆးတႆး ယူႇၼီႇၶူတ်ႉ တႄႇၸႂ်ႉတိုဝ်းလႆႈ ၼိူဝ်ၼႅင်ႈၾႃႉတေႉတေႉ။ ]
ပီႊ 2009 ၼၼ်ႉၼင်ႇၵဝ်ႇ လႆႈၶဝ်ႈႁဵတ်းမေႃသွၼ်လိၵ်ႈလၢႆးတႆး (တႃႇလုၵ်ႈဢွၼ်ႇႁဵၼ်း ၸၼ်ႉၼိူင်ႈ)ၶၢဝ်းမႆႈ ၼႂ်းဢိူင်ႇၼမ်ႉႁူးတွင်း၊ ၸေႊဝဵင်းၵျွၵ်ႉမႄး။ ၽိုၵ်းပၼ်လုၵ်ႈႁဵၼ်းယဝ်ႉ ဢွၼ်ႁူဝ်လုၵ်ႈႁဵၼ်း မိူဝ်းၶဝ်ႈပၢင်ၶႄႉသဵင်ႇ တႅမ်ႈလိၵ်ႈပွင် တီႈဢၼ်ၸၼ်ႉထၢၼ်ႈၸေႊဝဵင်း ၸတ်းႁဵတ်းၼၼ်ႉယဝ်ႉ။ (ၼႂ်းပၢင်ၶႄႉသဵင်ႇၼၼ်ႉ လုၵ်ႈႁဵၼ်း လႆႈၶၵ်ႉTOP 10 သွင်ၵေႃႉ)
ပီႊ 2010 လႆႈမိူဝ်းၶိုၼ်ႈပၢင်သွၼ်ၶၢဝ်းပွတ်း ဢၼ်ၸုမ်းၶရိတ်ႉယၢင်းၶဝ် ၸတ်းႁဵတ်းတီႈတႃႈၵုင်ႈၼၼ်ႉယူႇ။ ႁူဝ်ၶေႃႈပၢင်သွၼ်သမ်ႉပဵၼ် လၢႆးပူၵ်းပွင်လုၵ်ႈဢွၼ်ႇ ၸွမ်းထၢၼ်ႈၸူဝ်ႊၶူပ်ႇ ၼႆယဝ်ႉ။
ပီႊ 2011 - လႆႈၶိုၼ်ႈပဵၼ် မေႃသွၼ်လိၵ်ႈလၢႆးတႆး(ဢၼ်မေႃသွၼ်လူင်လုင်းၸၢႆးၾႃႈ ဢွၼ်ႁူဝ်ၸတ်းႁဵတ်း) ဢၼ်ၽိုၵ်းၽွၼ်ႉပၼ်ၶိုၼ်း မေႃသွၼ်လိၵ်ႈလၢႆးတႆး ၶၢဝ်းမႆႈၶဝ် ၼၼ်ႉယဝ်ႉ။ ပီႊ 2011 ၼႆႉ လႆႈၸတ်းပဵၼ်ပၢင်သွၼ်ပၢင်ၽိုၵ်းၽွၼ်ႉမေႃသွၼ် လၢႆလၢႆၸေႊဝဵင်းယူႇ။ မိူၼ်ၼင်ႇ - ၸေႊဝဵင်းၵျွၵ်ႉမႄး၊ ၸေႊတွၼ်ႊမၢၼ်ႈမူဝ်ႇ ၵုင်းလေႃး (ၸေႊမိူင်းၶၢင်)၊ ၸေႊဝဵင်းမိူင်းယၢင်း(ၸေႊမိူင်းၶၢင်)၊ လႅၼ်ႊတွၼ်ႊမိူင်းၶိူဝ်း(သီႇပေႃႉ)၊ လႅၼ်ႊတွၼ်ႊလွၺ်တႆးလီ(ၵႃလီႉ)၊ ၸေႊဝဵင်းၼမ်ႉၶမ်း၊ ၸေႊဝဵင်းမူႇၸေႊ ၸိူဝ်းၼႆႉယဝ်ႉ။
ပီႊ 2012 ၵေႃႈၼၼ် သိုပ်ႇပဵၼ်ၽူႈၶဝ်ႈၸုမ်းမေႃသွၼ်ပၢင်ၽိုၵ်းၽွၼ်ႉသေ ၸွမ်းမေႃသွၼ်လူင် သွၼ်ပၼ်ၵူႊလၢႆလၢႆၸေႊဝဵင်းယူႇယဝ်ႉ။
တႄႇမိူဝ်ႈ ပီႊ 2011 တေႃႇထိုင် 2016 ၵူႊပီႊပီႊ ၶပ်ႉၵၢမ်းၵၼ်ႁဵတ်းမေႃသွၼ်ၸွမ်း မေႃသွၼ်လူင်လုင်းၸၢႆးၾႃႈမႃးယဝ်ႉ။ ၼႂ်းၵႄႈၼၼ်ႉ လႆႈၶဝ်ႈပႃးၸွမ်း ၼႂ်းပၢင်ၵုမ်လူင် ပုၼ်ႈလိၵ်ႈလၢႆးတႆး တႃႇဢဝ်သွၼ် ၼႂ်းႁူင်းႁဵၼ်းလူင်ပွင်ႊၸိုင်ႈၼၼ်ႉယူႇ။ ပၢင်ၵုမ်လူင်ၼႆႉ ပဵၼ်ဢၼ်ၸုမ်းၽူႈလူင်ႉလႅၼ်ႇလိၵ်ႈလၢႆးတႆးႁဝ်းၶဝ်ၸဝ်ႈ ဢွၼ်ႁူဝ်ၸတ်းႁဵတ်းယဝ်ႉ။ ဝၢႆးပၢင်ၵုမ်လူင်ယဝ်ႉၵေႃႈ သမ်ႉလႆႈၶဝ်ႈပႃးၼႂ်းၸုမ်း ဢၼ်ၶဵၼ်ႇတႅမ်ႈထုတ်ႇဢွၵ်ႇ ႁႂ်ႈပဵၼ်ပပ်ႉႁဵၼ်းလိၵ်ႈတႆး ၸွမ်းထၢၼ်ႈႁဵၼ်း ၼႂ်းႁူင်းႁဵၼ်းလူင်ပွင်ႊၸိုင်ႈၼၼ်ႉယဝ်ႉ။(ပီႊၼႆႉ ပဵၼ်ပီႊ 2013 တီႈႁူင်းႁေႃၵေႃလိၵ်ႈလၢႆး ၸေႊဝဵင်းတူၼ်ႈတီးယဝ်ႉ။) ပီႊ 2014 သမ်ႉ လႆႈဢွၼ်ႁူဝ်ၵူၼ်းၼုမ်ႇၸေႊဝဵင်းၵျွၵ်ႉမႄးတင်းၼမ်သေ လူင်းၵဵပ်းသဵၼ်ႈသၢႆမၢႆႁူဝ်ၼပ်ႉၵူၼ်း ၼႂ်းၸေႊဝဵင်းဢမ်ႇၵႃး တႃႇလၢႆလၢႆၸေႊဝဵင်းၵေႃႈ လႆႈၸွၺ်ႈၸတ်းပၼ် ပၢင်သွၼ်ၵူၼ်းၼုမ်ႇ တႃႇဢဝ်လိၵ်ႈလၢႆးတႆးသေ တႅမ်ႈမၢႆတွင်း ႁူဝ်ၼပ်ႉမုင်ႉႁေႃႁိူၼ်း၊ ႁူဝ်ၼပ်ႉၵူၼ်းၼႂ်းၸိုင်ႈတႆးယဝ်ႉ။
ပီႊ 2017 လွၼ်ႈၶူဝ်းၵူၼ်းႁိူၼ်းသေ မိူဝ်းယွၼ်းၼုင်ႈၽႃႈလိူင်သၢင်ႇၵၢၼ်း ႁဵတ်းသၢင်ႇသႃႇမၼေႇယူႇၼိူဝ်ၵျွင်း ပၺ်ႇၺႃႇလင်ႇၵႃႇရ(ၸေႃးတီႉ)၊ ၸေးဝဵင်းမိူင်းယၢင်း(ၸေႊမိူင်းၶၢင်)ယဝ်ႉ။ လႆႈမိူဝ်းသိုပ်ႇႁဵၼ်းဢဝ် ပၢႆးလိၵ်ႈလင်ႇၵႃႇလူင်(ၾၢႆႇတႅမ်ႈၾၢႆႇလူ/ႁေႃး)ယဝ်ႉ။ ပီႊ 2018 ၶိုၼ်ႈပဵၼ်ၸၢင်းယဝ်ႉ ႁဵတ်းသြႃႇသွၼ်လိၵ်ႈတႆးပၢၼ်မႂ်ႇပၼ် ၸဝ်ႈသၢင်ႇဢွၼ်ႇၶဝ်ၼိူဝ်ၵျွင်းယဝ်ႉ။
ပီႊ 2019 မီးၵပ်ႉပီႇယသၢင်ႇလွင်းၼမ်လႄႈ မိူဝ်ႈၶဝ်ပႆႇၼုင်ႈလိူင်ၼၼ်ႉ လႆႈၽိုၵ်းသွၼ်ပၼ် လိၵ်ႈလၢႆးတႆး ႁႂ်ႈပေႉတူဝ်ၵူႊပႃးပႃးယဝ်ႉ။
ပီႊ 2020 ထၢၵ်ႈလူင်းၵျွင်း လၢႆႊၼုင်ႈၶူဝ်းၵူၼ်းႁိူၼ်းသေ ၸွမ်းမေႃသွၼ်လူင်လုင်းၸၢႆးၾႃႈ မိူဝ်းၸွၺ်ႈသွၼ် ပၢင်ၽိုၵ်းၽွၼ်ႉ လၢႆးပူင်သွၼ် လိၵ်ႈလၢႆးတႆး တီႈၵျွင်းသိူၵ်ႈမူႇ၊ ၸေႊဝဵင်းၽႃၵၢၼ်ႉ၊ ၸေႊမိူင်းၶၢင်ယဝ်ႉ။ (ပီႊၼႆႉ ၺႃးတၢင်းပဵၼ်ႁႃႊ (ၶူဝ်ႇဝိတ်ႉ19) လႄႈ လႆႈတႄႇလိုဝ်ႈပၢင်သွၼ် ပၢင်ၽိုၵ်းၽွၼ်ႉမေႃသွၼ်ယဝ်ႉ)
ပီႊ 2021 လႆႈပဵၼ်ၽူႈၸွၺ်ႈၸတ်း ၼႂ်းႁူင်းႁဵၼ်းၸၼ်ႉဢွၼ်မႂ်ႇသုင်၊ မၢၼ်ႈၸေႃးတီႉၵုင်း၊ ၸေႊဝဵင်းၵျွၵ်ႉမႄး။ တႃႇၶၢဝ်းတၢင်း 2 ပီႊ တေႃႇထိုင် ပီႊ 2022 ၼၼ်ႉယဝ်ႉ။
ပီႊ 2023 သမ်ႉ ၸၼ်ႉၸွမ်တူင်ႇၵူၼ်းတႆး မီးတၢင်းလူဝ်ႇမေႃသွၼ်လိၵ်ႈလၢႆးတႆးလႄႈ လႆႈမိူဝ်းႁဵတ်းမေႃသွၼ်လိၵ်ႈလၢႆးတႆး တီႈၸၼ်ႉၸွမ်တူင်ႇၵူၼ်းတႆး တေႃႇထိုင် ပီႊ 2025 ယဝ်ႉ။
